Wednesday, October 11, 2017

CHADEMA WAMJIBU IGP SIRRO NA JERRY MURO

SHEHE PONDA AMJULIA HALI TUNDU LISSU NAIROBI , AZUNGUMZIA HALI YA KIUSALAMA NCHINI



Mkutano wa Katibu wa Jumuiya na Taasisi za Kiislamu, Sheikh Ponda Issa Ponda na waandishi wa habari, umevamiwa na polisi waliokuwa wanataka kumkamata ili kuzuia mkutano huo usifanyike.

Hata hivyo, polisi hao walioingia katika hoteli ulikofanyika mkutano huo, Kariakoo jijini Dar es Salaam, walishindwa kumpata Sheikh Ponda kwani tayari alikuwa amemaliza kuzungumza na waandishi hao na kuondoka.

Kutokana na hali hiyo, polisi wakawazuia baadhi ya waandishi waliokuwepo eneo hilo na kuwataka kutoa ushirikiano kwa kile kilichozungumzwa na Sheikh Ponda baada ya kumkosa.

Licha ya ushirikiano walioonyesha waandishi hao, polisi waliwakamata waandishi wawili, Ahmed Kombo wa Blog ya Z4 news, na mpiga picha wa gazeti la Daily News, Seleman Mpochi ambaye wakati huo alikuwa anapiga picha katika tukio hilo.

Polisi walimchukua Kombo hadi kituo kikuu cha Polisi na kumtaka awape taarifa iliyoandaliwa na Ponda ambapo alitii na kuwapa ambapo hata hivyo, waliachiwa baadaye.

Pamoja na mambo mengine akiwa katika mkutano huo, amesema Mbunge wa Singida Mashariki, Tundu Lissu amewataka Watanzania waendelee kushikamana ili kuhakikisha wanatetea wananchi na kupinga vitendo vya unyanyasaji vinavyofanywa na serikali ikiwamo kuzuia mikutano ya hadhara kwa wanasiasa.

Amesema amepata faraja kumuona mbunge huyo ambaye anaendelea na matibabu jijini Nairobi, nchini Kenya baada ya kushambuliwa kwa risasi Septemba mwaka huu, kwamba hali yake inaendelea vizuri ambapo pia amemhakikishia kuwa akipona ataendelea na harakati na kutetea maslahi ya wananchi.

“Wakati umefika sasa kila mwananchi, mwanasiasa, viongozi wa dini, haijalishi muislamu au mkristo, wasomi wa vyuo vikuu na watu wa kada mbalimbali tushirikiane pamoja ili kuhakikisha tunakemea vitendo viovu vinavyofanywa kama ni serikali au kikundi cha watu wachache wanaojiita wasiojulikana,” amesema Ponda.

CHANZO : Mtanzania

KAMANDA SIRRO HANA MAMLAKA YA KISHERIA YA KUZUIA WATU WASIJADILI SUALA LA TUNDU LISSU

KAULI YA MWENYEKITI WA CHADEMA MHE FREEMAN MBOWE BAADA YA KAULI YA KARDINALI PENGO KUHUSU SUALA LA KATIBA

Mwenyekiti wa Chadema, Freeman Mbowe amesema kauli ya Askofu Mkuu wa Kanisa Katoliki, Jimbo Kuu la Dar es Salaam, Polycarp Kardinali Pengo kuhusu mchakato wa Katiba imewasikitisha.
Wakati Mbowe akitoa kauli hiyo, mwenyekiti wa kamati ya kitaifa ya maadili, amani na haki za binadamu kwa jamii ya madhehebu ya dini zote Tanzania, Askofu William Mwamalanga amemshauri Rais John Magufuli kuufufua mchakato huo uliokwama.

Mbowe, ambaye pia ni Kiongozi wa Kambi Rasmi ya Upinzani Bungeni akizungumza jana baada ya kuombwa kutoa maoni yake kuhusu msimamo wa Kardinali Pengo kwamba Katiba siyo kipaumbele chake, bali huduma za jamii, Mbowe alisema Askofu huyo ni kiongozi wa dini anayepaswa kulinda heshima aliyonayo ndani na nje ya kanisa.

Katika taarifa yake ya kufafanua kauli iliyotolewa na Askofu wa Jimbo la Rulenge mkoani Kagera, Severine Niwemugizi baada ya kukaririwa akisema kwamba Katiba Mpya ndiyo kipaumbele cha wananchi, Kardinali Pengo alisema hayo yalikuwa maoni yake binafsi siyo msimamo wa Kanisa Katoliki nchini.

“Mtu akiniambia priority (kipaumbele) ya Tanzania ni Katiba Mpya inabidi anithibitishie huo ukipaumbele maana siwezi kuona mtoto anakufa kwa njaa au kwa kukosa dawa eti kwa sababu ya Katiba Mpya. Kwangu mimi Katiba ni kitu ambacho kije baadaye, si cha haraka.

“Wanasiasa wasiache watoto wetu wafe kwa njaa kisa malumbano ya Katiba. Wasiache watoto wakose shule kwa sababu hela zote zimeishia kwenye malumbano juu ya Katiba,” alisisitiza Kadinali Pengo.

Lakini jana akizungumzia msimamo huo, Mbowe alisema, “Askofu Pengo ni kiongozi wa kanisa, anaheshimika na wananchi ambao si wale anaowaongoza tu lakini kwa kauli yake kuhusu Katiba, imetushangaza na imenisikitisha,” alisema Mbowe na kuongeza:

“Suala la elimu, chakula na maisha yetu yanalindwa na Katiba, ndiyo msingi wa mifumo ya rasilimali za Taifa. Anaposema haoni umuhimu wa Katiba anatufikirisha, anataka kusema mchakato wa Katiba uliogharimu mabilioni ya fedha leo hauna maana?”

Mbowe alisema umefika wakati mchakato wa Katiba uliokwama ukaendelezwa na hasa kuanzia katika rasimu ya Katiba iliyoandaliwa na Tume ya Mabadiliko ya Katiba chini ya mwenyekiti, Jaji mstaafu Joseph Warioba.

“Katiba ni maridhiano, tunahitaji kupata maridhiano ya pande zote, nirudie tu kwamba alichokisema Askofu Pengo kinasikitisha.”

Mbali ya Mbowe, Askofu Mwamalanga alisema suala la Katiba ni la Watanzania wote na si la mtu au kundi la watu hivyo mchakato huo unapaswa kuhitimishwa na si vinginevyo.

“Sisi mtazamo wetu, tuko pamoja na wale wanaotaka Katiba Mpya, suala la Katiba si la mtu mmoja. Mapambano ya ufisadi na rushwa yanapaswa kutambulika na Katiba na wananchi wanataka Katiba kwa nini wasipewe Katiba yao?

“Ni aibu kuona mabilioni yaliyotumika kwa Tume ya Jaji Warioba na Bunge Maalumu ya Katiba halafu mchakato unaishia juujuu. Nimshauri Rais (John) Magufuli kama anataka heshima kubwa ni huu mchakato uanzishwe kwani wananchi wanataka katiba yao.”

Pia, katibu wa Taasisi ya Masheikh na Wanazuoni wa Kiislamu Tanzania, Sheikh Khamis Mataka ambaye aliomba kutoa maoni yake binafsi kuhusu mchakato huo wa Katiba alisema kinachopaswa kufanyika sasa ni jamii nzima kutafakari ni Katiba ipi ambayo wanaitaka.

“Vyama vya siasa, NGO (mashirika yasiyo ya kiserikali), kada za dini waendelee kuzungumza na kutafakari ni Katiba ipi tunaitaka, hii inayopendekezwa au turudi nyuma, unaweza kujiuliza ukiendelea na hii kwa kuipigia kura ya ndiyo au hapa, jibu litakuwa ni hapana hivyo tujadili ni Katiba ipi tunaitaka” alisema Sheikh Mataka ambaye pia ni msemaji wa Baraza Kuu la Waislamu Tanzania (Bakwata).

Kardinali Pengo Jumamosi iliyopita alinukuliwa akisema kauli iliyotolewa hivi karibuni na Askofu wa Jimbo la Rulenge-Ngara, Severine Niwemugizi kuwa Katiba mpya ndiyo kipaumbele cha wananchi ni maoni yake binafsi na si msimamo wa Kanisa Katoliki nchini.

Alisema hilo alipotoa ufafanuzi kuhusu sitofahamu iliyojitokeza miongoni mwa Watanzania na waumini wa kanisa hilo kutokana na kauli ya Askofu Niwemugizi.

“Napenda kutamka moja kwa moja kwamba huo si msimamo wa kanisa na hauwezi kuwa msimamo wa kanisa kwa sababu sisi tuna utaratibu wetu wa kuishauri Serikali au kuzungumzia masuala ya jamii,” alisema.

Friday, October 6, 2017

Mauaji na Utekaji Tanzania: CHADEMA walia na Serikali, Lema, Masha na Kigaira walaumu IGP Sirro na Magufuli



John Mrema: Leo ni siku ya 29 tangu Lissu afanyiwe jaribio la kumuua, lakini mpaka sasa Polisi hawajaeleza Chochote wala hawajamshikilia Popote. Polisi walisema wameshikilia Nissan nane lakini wamiliki hawajulikani na Zilipo hapajulikani kwani hatujawahi kuziona.

John Mrema: Viongozi wa CHADEMA wanazidi kufuatiliwa na wa tu wasiojulikana. Wabunge Bulaya, Nassari, Lema, Makamu Mwenyekiti wa CHADEMA kanda ya Victoria Ngurumo, wote wametishwa na watu wasiojulikana. Lissu alitoa taarifa kwamba anafuatiliwa na watu wasiojulikana na baadae akashambuliwa.

John Mrema :" Ester Bulaya ametoa taarifa ametoa taarifa anafuatiliwa na watu wasiojulikana na wamemfuata mpaka nyumbani kwao Bunda" John Mrema

John Mrema: Leo tumewaita ili tuwaeleze kwamba huu mtiririko wa haya matukio inazidisha hofu na maiti 17 zilizopatikana Coco beach zinazidishaa hofu na Polisi polisi wanatoa majibu mepesi. Polisi wanadai Maiti zimetoka Angola na Msumbiji.

Sasa anaongea Mkurugenzi wa Mafunzo na Oganizesheni Chadema Taifa, Benson Kigaira.

Kigaira: Kupitia nyie wanahabari tunawafikia watanzania. Tunataka tuzungumzie kuhusu hawa watu wasio Julikani na jinsi Polisi wanavyolishughulikia hili swala ndo maana tunasema na kuamini Serikali inahusika. Naomba muelewe hakuna aliye salama.

Kigaira: Lissu alitoa taarifa kuhusu kufuatiliwa kwake, na kuna kijana kwenye mitandao ya Kijamii alikuwa anaomba apewe Ruhusa yakumuua Lissu kwa Mikono yake. Baadae Lissu alipigwa risasi wala hajahojiwa. Baada ya Lissu Kupigwa risasi, akapost tena kwamba anasikitika sana kwa mtu aliyefanya hilo tukio la kumuua Lissu alitegemea asikie Lissu amekufa. Akasema wanamsubiri arudi safari hii hawatamkosa. Kwanini Polisi hawamuoni? Kwanini jicho la Polisi linachagua watu wa kuona? Kwanini Mtu akimkosoa Rais Magufuli unakamatwa jioni yake?

Kigaira: Hizo Nissan zilizokamatwa Polisi walizikuta Porini? mbona wamiliki wa hizo gari hawakamatwi? Ni kanyabonya wanataka kutudanyanya.

Kigaira: Mwigulu Nchemba alisema gari lililokuwa linamfuatilia Lissu lipo arusha halijawahi kukanyaga Dar es Salaam. Anatumia chombo gani kujua gari limefika sehemu fulani? Kama nacho hicho chombo basi anajua gari gani lilihusika kumpiga Lissu. Kwanini wenye gari wanatetewa? Huyo mtu anatuhumiwa, alitakiwa wamkamate yeye ndo aseme gari halijawahi kufika dar, kwanini mwigulu anamsemea? Hawa watu wanahusika.

Kigaira: Miili inayookotwa pale Coco beach hatujui ni ya nani na hatujui kama kesho wewe hautaokotwa Coco Beach. Polisi wanatakiwa watuambie na rais anatakiwa ajue, kama hajui hata yeye hayupo salama. Usalama wake nani anamhakikishia, kama hawana mashaka wanajua.

Kigaira: Polisi wanasema tumesimamisha upelelezi wa Lissu sababu Dreva hajapatikana. Je Dereva angekufa upelelezi usingefanyika? Dreva alikuwa ndani na risasi zimetoka nje. Pale getini kuna walinzi wanne wa Suma JKT siku ile walikuwepo wawili, na wao ndo waliruhusu gari liingie na baada ya kuingia waliruhusu gari likatoka, walishaulizwa?

Pale kwa naibu spika kuna Walinzi wenye silaha, kwanini hawakuipiga gari hata kwenye matairi, Risasi walizisikia. Kabla ya kumtafuta Dreva, hawa walinzi wapo wapi? kwanini hawahojiwi? wanamtaka Dreva. dreva anatibiwa, wanaweza kumfuata wakitaka. Lakini hawawezi kuacha upelelezi kisa Dreva hayupo.

Kigaira: IGP Sirro anataka kulitumia Jeshi la Polisi kisiasa. Mtu aliyemtishia bunduki Nape miezi kadhaa iliyopita, Kesho yake baada ya tukio lile, Polisi wakasema yule mtu sio Polisi, Wakati fulani Waziri wamambo ya ndani alisema alikuwa Polisi alishakamatwa na baadae akasema hajakamatwa. Leo Sirro anaomba watu wamsaidie kumjua mtu aliyemtishia Nape Bastola. Sirro hajamwambia aliyekuwa RPC wa Kinondoni Salome Kaganda aliyekuwa akiongoza Askari kumkataza Nape asifanye mkutano. Polisi walimuona hawakumkamata na leo wanaomba msaada wa kusaidia Polisi wamkamate.

Kigaira: Picha zipo, na jana watu walimtumia Sirro Picha nyingi sana, kwamba Wewe Sirro ambaye unasema Huyo mtu humjui, huyo hapo ni Bodyguard wa Makonda, lakini hajamtafuta.

Kigaira: Baada ya Video ya Rushwa iliyooneshwa na Lema na Nassari, Jerry Murro alisema "Nitashangaa sana kama vyombo vya dola vitaachia hili jambo lipite. Watu kama hawa wakina Nassari na Lema walitakiwa wapotezwe kabisa. Anashangaa Polisi halijawapoteza hawa watu. Kwanini Polisi haiwakamati watu kama Jerry wanaotishia amani ya Nchi? Kwanini hawawahoji?

Kigaira: Kwenye kikao cha ALAT cha juzi, baada ya hotuba ya rais, Mameya na Wakurugenzi waliomba ijadiliwe, lakini mwenyekiti wa ALAT alisema amepata maelekezo toka juu kwamba Hotuba hii haitakiwi kujadiliwa. Baadae kinyume na Utaratibu akaletwa mtu aliyejitambulisha kwamba yeye ni Mkurugenzi wa Oparasheni wa Jeshi la Polisi na akasema ameleta salamu za IGP kwenye Kikao cha ALAT. Akawambia yeye ndo anashghulikia vurugu zote, akasema hata watu waliopotea yeye ndo anshughulika. Halafu akaondoka. Hii ina maana alienda kuwatisha. Inawezekanaje Serikali aende kutisha kikao? tukisema Serikali inahusika, wanasema tunafanya uchochezi. Sisi tunaongea hali ilivyo, hali hii sio ya kitanzania.

Sasa anaongea Godbless Lema Waziri kivuli wa mambo ya ndani.

Lema: Kwa bahati mbaya sana tuna IGP anafikiri kuwa Kamanda mkakamavu ni kubeba silaha, Kamanda wa kweli sio Mtu mwenye silaha nyingi kwenye ghara bali ni mtu anayeweza akaconfront the truth hata mbele ya Boss wake.

Lema: IGP ni cheo kikubwa sana, jana mumeona IGP anaappeal kwa Public anaomba taarifa kwa raia wema ya mtu ambaye anamjua yule bwana ambaye anamjua aliyemtishia Nape Bastola. Kwa kauli sensitive kama ile, tungekuwa na nchi yenye good governance, IGP na Mwigulu leo wasingetakiwa kuwepo kazini. Baadae tunaona picha za huyo IGP anayeomba Msaada kwetu, tunamuona huyo mtu akiwa nyumba ya Makonda na IGP anamlinda IGP. Kama tuna IGP analinda Mhalifu, ina maana tanzania hii sio salama ya kuishi.

Lema: Wananchi wanaendelea kupoteza matumaini na jeshi la Polisi siku hadi siku, na hao wananchi wanaopoteza Matumaini ya jeshi la Polisi sio wajinga kwa kiwango hiki, sio wapuuzi kwa kiwangu hiki. Wasiwasi wangu hawa wananchi wakichoka,sifa tuliyonayo tanzania itapotea.

Lema: Jana tulimpelekea Picha nyingine Sirro ya Askari aliyekuwa akimvuta Nape kwenye gari sijui ni askari wa kikosi maalum, tukapeleka picha zote, tukamwambia hata huyu humjui ambaye amepiga picha hadharani? Sasa kama mkuu wa jeshi la Polisi anaweza kufanya hivi, hawa wadogo wakichukua maamuzi ya kudhalilisha watu kupiga watu na kuonea huko barabarani msiwalaumu kwa sababu wameshapata maelekezo kwa tabia za mkuu wa Jeshi la Polisi.

Lema: Ukiangalia tabia za Waziri Mwigulu, Sijui wanafanya nini ofisini, watu wanapotea, watu wanakufa na maiti zinaokotwa, nyie mnataka muwe sehemu ya wale watu, leo anatokea Waziri wa mambo ya ndani anasema wale inawezekana ni wakimbizi, Mkimbizi gani anauawa kinyama? Matishio yamekuwa mengi nchi hii.

Lema: Nilitekwa Makuyuni nikiwa na Mheshimiwa diwani Baranga, Nlipotekwa nlipiga simu kutafuta msaada wa RCO wa Arusha pomoja na Mwigulu, tuliweza kufanikiwa kukimbia na gari hadi sehemu walipokuwa Polisi, tukawaeleza na Polisi wakaenda sehemu ya tukio. Asubuhi nikapata taarifa kwamba Polisi walienda wakaua mtu mmoja kwenye hilo tukio. Inasadikiwa ni Miongoni mwa vijana 30 waliokuja kumteka mbunge wa Arusha Mjini.

Baadae nikapata baraka ya kwenda Magereza, nikiwa Magereza waliletwa vijana wengi walihusishwa na lile tukio. Nmekaa Magereza muda mrefu wakanisahau, Nikiwa Magereza Mbunge wa Babati Vijijini akaanza kuwafuatilia wale vijana walioitwa watekaji wa Lema.

Kumbe wale vijana waliopigwa risasi, walikuwa wanamfuatilia mtu aliyewaibia bodaboda. na huyo alouawa kauwawa kimakosa.

Polisi wakaanza kubembeleza familia imzike yule alopigwa risasi, ili aweze kuzikiwa walitaka wale waliokamatwa waachiliwe. Sijawahi kuona release order ikitoka mahakamani siku ya Jumapili kuja kutoa watu magereza, nliona siku ile. Manake lile tukio halikuwa la kijambazi ilikuwa ni hila kutuumiza maisha yetu.

Lema: tnachoappeal kwenu waandishi wa habari, kama Serikali inasema watu hawajulikani, basi Waziri na IGP hawatakiwa kuwa Maofisini.

Lema: Haya mambo yana mwisho, wakasikilize Redemption Song Lyrics - Bob Marley. Haya mambo yana mwisho


Lema: Yanafanyika darini, yatasitirika hadharani. Leo wanatuomba ushahidi. Huu mchezo unaoendelea, hawa vijana wanaliingiza taifa kwenye machafuko. Kilio cha watu kuuawa ni kilio cha watanzania wote wanaomheshimu Mungu. Kwanini Magufuli anarelax hawatafuti hawa watu?

Lema: Hawa watu wanafanya vitu viwili, moja kututishia tukae kimya lakini mbili mkikataa kutishiwa muuawe. wakitumaliza sisi watahamia kwenye makanisa ni Misikiti, ni rai yangu kwa wachungaji na Maaskofu, wasipigie tu kelele kwenye viroba, bali wapigie kelele na haya mauaji.

Lema: Magufuli ajue sisi pia tuna mwili na tuna damu na tuna ndugu. Hii hali imeanza kuleta matabaka.

Sasa anaongea Waziri wa zamani wa Mambo ya Ndani, Lawrence Masha.

Masha: Nawakumbusha watanzania kazi ya jeshi la Polisi. Kazi yake kuu ni kulinda raia na mali zao pamoja na wageni wanaoingia bila kuangalia itikadi zao.

Masha: Ni vyema jeshi letu la Polisi litusaidie kupunguza hizi hisia.

Masha: Nlishangaa kuona Waziri wa Mambo ya ndani anakataa msaada wa uchunguzi kutoka nje ya nchi. Nikajua hawana nia njema. Sio jambo geni mbona viongozi wetu wamefanya training nje ya nchi? IGP aliyepita, kamanda wa Takukuru, Wambura wamefanya training Marekani. Kupokea msaada katika swala la uchunguzi sio aibu wala fedheha, hata Marekani wanaomba msaada kutoka nchi nyingine.

Masha: Namuomba rais awaagize makamanda wake watafute msaada, leo hii watanzania wanaishi kwa hofu.

Masha: Sisi watanzania maswala ya kiitikadi hajawahi kutusumbua wala udini. lakini sasa hivi watu wana hofu.

Masha: Juzi kati mzungu alosaidia nchi kupunguza uwindaji wa Tembo, alipigwa risasi akauawa.

Masha: Watu wanaogopa kutoka nje, watu wanaogopa kutembea usiku sasa hivi watu wanaogopa hata kuongea.

Masha: Waombe makamanda wako wapokea msaada wa uchunguzi sio fedheha.

Masha: Wananchi waendelee kumuombea Lissu na Viongozi wetu wote. Na serikali ifanye kazi inayopaswa kufanywa.

Bulaya: Nipo katika hatari kubwa, nimefuatiliwa na watu waliovalia kininja nyumbani

Mbunge wa jimbo la Bunda Mjini kupitia tiketi ya CHADEMA, Ester Amos Bulaya, amesema yupo katika hatari kubwa kutokana na kufuatiliwa na watu ambao anahisi sio wazuri huku wakiwa wamevalia mavazi ya ninja, nyumbani kwake wilayani Bunda.

Bulaya ameto taarifa hiyo alipokuwa akiongea na mwandishi wa East Africa Television, na kusema kwamba watu hao walimfuata nyumbani kwake wakiwa na gari ya Noah huku wamevalia kinija, bahati nzuri hakuwepo nyumbani hivyo ndugu zake wakamwambia asirudi nyumbani siku hiyo.

Ester Bulaya ameendelea kuelezea kwamba watu hao walizunguka kwa baadhi ya ndugu zake akiwemo bibi yake na kumkosa, lakini alienda kutoa taarifa polisi na mkuu wa kituo kuanza kufuatilia suala hilo, lakini haikuchukua muda akahamishwa kituo cha kazi.


NYONGEZA YA MISHAHARA KWA WATUMISHI SIO HISANI YA RAIS!

Mnamo Septemba 5, mwaka huu, akijibu swali namba 3486, nililouliza bungeni kwa niaba ya watumishi wote nchini, hususani wale ninaowawakilisha mkoani Mwanza, Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Angela Kairuki, alikiri mbele ya umma masuala kadhaa ambayo ni vyema yakaendelea kuwa katika kumbukumbu sahihi kwenye mjadala unaoendelea nchini sasa kuhusu madai ya ongezeko la mshahara kwa watumishi nchini.

1. Alikiri kuwa Serikali haiajiri (bila shaka pamoja na ongezeko la stahili za waajiriwa hao) kwa utashi wa Rais.

2. Serikali imeshatenga bajeti, kupitia mwaka wa fedha wa 2017/18 (kwa ajili ya kutekeleza takwa la kisheria) kuongeza mishahara kwa watumishi nchini.

Katika swali langu la msingi niliitaka Serikali kutoa kauli kwa watumishi wa umma waliokuwa wameajiriwa tayari na kusainishwa mikataba ya ajira serikalini kabla Rais John Magufuli hajatoa kauli ghafla kusitisha ajira serikalini kupisha kile kilichoitwa zoezi la ukaguzi wa vyeti hewa.

Aidha niliitaka Serikali itoe kauli iwapo inatambua kuwa watu hao tayari walikuwa ni watumishi na mchakato wa kuwaingiza kwenye payroll ulishaanza lakini ukasitishwa ghafla na sasa wako mtaani na hawajui hatma yao.

Katika majibu yake kwa swali hilo la msingi, Serikali ilisema kuwa watumishi hao waliosimamishwa mwezi Mei, walisharejeshwa kazini, wanaendelea na majukumu yao, kulipwa mishahara yao na ikasema kuwa wanatambulika kama watumishi serikalini. Pengine majibu ya serikali kwa maswali ya nyongeza ndiyo yaliibua mkanganyiko mkubwa zaidi na yanaweza kuhusika zaidi katika mjadala huu unaoendelea sasa;

Katika maswali mawili ya nyongeza, nilitaka Serikali lini itaondoa dhana zinazoanza kujengeka nchini (kuhusu ajira) kuwa;

(i)hadi sasa imeshindwa kuajiri kwa sababu haina hela

(ii) serikali inaajiri kwa utashi wa Rais badala ya mahitaji yaliyopo pamoja na matakwa ya kisheria.

Swali la pili la nyongeza lilitaka Serikali ieleze kwanini haipandishi madaraja (mishahara) ya watumishi kama sheria zinavyoelekeza.

Ilikuwa wazi kuwa Serikali haikuwa imejipanga kwa mazuri ya uhakika. Lakini kupitia waziri husika ambaye kwa kiasi fulani alipata shida kujibu maswali hayo, Serikali ikatoa kauli bungeni kukanusha kuwepo kwa zile dhana mbili nilizozitaja hapo juu, lakini pia ikatoa kauli kuwa imeshapanga bajeti ya nyongeza ya mishahara kwa watumishi wa umma nchini.

Wananchi, hasa watumishi wanaoamini kuwa uwajibikaji wa pamoja wa kiserikali, waliichukulia kauli ile ya serikali ndani ya bunge kuwa mathubuti, ikisubiri utekelezaji tu. Kumbe haikuwa hivyo! Kauli za juzi za Rais Magufuli wakati akifungua mkutano wa Jumuiya ya Serikali za Mitaa na Tawala za Mikoa (ALAT), kwamba hatapandisha wala hana mpango wa kupandisha mishahara ya watumishi nchini, si tu kwamba zimesababisha mkanganyiko mkubwa wa kauli zake mwenyewe zinazokinzana akizitoa kwa nyakati tofauti katika jambo hilo hilo, lakini pia zimepeperusha mbali matumaini kidogo yaliyoanza kurejea kwa watumishi baada ya majibu yaliyotolewa bungeni.

Inastaajabisha na kusikitisha! Kupitia taarifa hii kwa vyombo vya habari na umma wa Watanzania, kwa dhima ile ile, kwa niaba ya watumishi wote nchini, hususani wale wa Mkoa wa Mwanza ambao ninawajibika kuwawakilisha na kuwasemea, napenda kusema;

1. Kauli hiyo ya juzi ni ishara ya mambo mengi ikiwa ni pamoja na;

(i) Dharau kwa mhimili wa Bunge, dharau kwa watumishi nchini, dharau kwa wananchi.

2. Kwamba nyongeza ya mishahara kwa watumishi inatolewa kwa hisani au kadri rais anavyojisikia.

3. Kauli ya serikali iliyotolewa bungeni haikuwa kweli. Kutokana na hayo, naomba kutoa wito kama ifuatavyo;

1. Wito kwa watumishi wote wa mkoani Mwanza wakishirikiana na wenzao wengine nchi nzima, kupitia vyama na jumuia zao mbalimbali, kusimama kidete kupinga kauli na ulaghai wa serikali kuhusu stahili zao. Watetee haki zao, hasa hii ya nyongeza ya mshahara, bila kuogopa!Mapambano ya kupigania haki za wafanyakazi duniani kote ni sehemu ya mapambano ya kitabaka.

2. Ni muhimu serikali yetu, kama ilivyo sehemu zingine duniani, itumie lugha ya kistaarabu na staha hasa kupitia njia za majadiliano ya mezani kufikia mwafaka katika kutatua matatizo ya wafanyakazi na kada zingine katika jamii.

3. Wananchi na makundi mengine katika jamii kusimama pamoja na wafanyakazi dhidi ya unyanyasaji huo ambao ni kinyume na sheria zetu, kwa sababu sasa inazidi kudhihirika kuwa hakuna kundi liko salama au litabaki salama kwenye mikono ya utawala usiozingatia Katiba na kukiuka sheria za nchi. Kwa sababu inaonekana kauli iliyotolewa bungeni kuhusu nyongeza ya mishahara haikuwa kauli inayotokana na mipango au uwajibikaji wa pamoja wa serikali yetu, basi mambo matatu yafuatayo yafanyike;

1. Bunge letu liitake serikali iwajibike bungeni kuhusu kauli (commitment) hiyo ambayo sasa ni dhahiri kuwa haikuwa ya kweli.

2. Waziri Angela aone umuhimu wa kuwajibika, kwa ama kutoa kauli isiyokuwa ya kweli bungeni au kwa sababu kauli yake hiyo (iwapo ilikuwa ya kweli) imekanushwa hadharani tena na mkuu wake wa kazi. Kanuni ya msingi ya utawala bora inamuondolea uhalali wa kuendelea kuwa sehemu ya timu ya serikali.

3. Kama waziri husika alitoa kauli hiyo bila kuwa imetokana na uwajibikaji wa pamoja katika Baraza la Mawaziri au mipango ya serikali, basi Rais amfukuze kazi waziri huyo mara moja kwa kutoa kauli isiyokuwa ya kweli tena bungeni.

Susanne Maselle Makene Mbunge Viti Maalum Mkoa wa Mwanza

UCHAGUZI WA UMOJA WA MADIWANI CHADEMA TAIFA

CHAMA CHA DEMOKRASIA NA MAENDELEO (CHADEMA)

TAARIFA KWA VYOMBO VYA HABARI- UCHAGUZI WA UMOJA WA MADIWANI CHADEMA TAIFA

Tunatoa taarifa kuwa muda wa kuchukua na kurejesha fomu kwa ajili ya kugombea nafasi za uenyekiti, ukatibu, mnadhimu, mweka hazina na mratibu wa mawasiliano na uhusiano wa Umoja wa Madiwani wa CHADEMA Taifa, umeongezwa hadi tarehe 30 Oktoba, 2017.
Fomu zinapatikana kwenye ofisi zote za Kanda za Chama , Mikoa na Wilaya. Wenye sifa ya kugombea nafasi hii ni Madiwani wote wa kuchaguliwa na Viti Maalum isipokuwa Mameya na Wenyeviti wa Halimashauri pamoja na Manaibu na Makamu wao hawatakuwa na sifa za kugombea nafasi hii.

Fomu zote zinatakiwa kufika Makao Makuu ya Kanda ifikapo saa 10.00 jioni ya tarehe 30 Oktoba, mwaka huu.
Kwa wale wote ambao walishachukua na kurejesha fomu hawatatakiwa kujaza fomu upya.

Kwa ajili ya kuweka uratibu mzuri baina ya madiwani na chama katika utendaji wa kila siku, Chama kupitia Katiba yake, kiliweka nafasi ya madiwani kuwakilishwa moja kwa moja katika vikao vya maamuzi kuanzia ngazi za chini hadi ngazi ya taifa.

Umoja huu umeundwa kwa mujibu wa Katiba ya Chama ibara ya 9.5.6; "Kutakuwa na Umoja wa Madiwani wa CHADEMA nchini ambao utakuwa na Uongozi, vikao na kuendeshwa kwa mujibu wa kanuni zitakazotungwa na Baraza Kuu la Chama."

Kwa mujibu wa Katiba hiyo, ibara ya 7.7.14 (O), Mwenyekiti na Katibu wa Umoja huu watakuwa wajumbe wa Kamati Kuu ya Chama.
Utaratibu huu unawawezesha madiwani wa chama kuwa na uwakilishi wa moja kwa moja na sauti zao kusikika kwenye vyombo vya maamuzi vya Chama kupitia kwa viongozi waliochaguliwa na madiwani wenyewe.

Tunawatakia Maandalizi mema wale wote wenye nia ya kugombea nafasi hizo.

Imetolewa leo tarehe 05 Octoba, 2017 ;
John Mrema
Mkurugenzi Itikadi, Mawasiliano na Mambo ya Nje - CHADEMA


MAJIBU YA JOSEPH SELASINI KWA IGP SIRRO

Wednesday, October 4, 2017

TAARIFA KWA VYOMBO VYA HABARI NA UMMA KUHUSU KAULI TATA ZA RAIS JOHN MAGUFULI LEO KWA WAFANYAKAZI

TAARIFA KWA VYOMBO VYA HABARI NA UMMA KUHUSU KAULI TATA ZA RAIS JOHN MAGUFULI LEO KWA WAFANYAKAZI

Wananchi wengi waliokuwa wakifuatilia matangazo ya moja kwa moja ya hotuba ya Rais John Magufuli leo kupitia njia mbalimbali za upashanaji habari wakati akihutubia mkutano wa Jumuia ya Serikali za Mitaa na Tawala za Mikoa (ALAT), wamesikitishwa, kama ambavyo sasa inaanza kuzoeleka na kuwa kawaida, na kauli zilizotolewa na Rais kwa taifa bila kupima athari kubwa na hasi katika utekelezaji wa sheria za nchi, uzingatiaji wa taratibu za uendeshaji nchi na misingi ya demokrasia na utawala bora.

Pamoja na wananchi kushangazwa na kauli nyingi zilizotolewa na Mhe. Rais Magufuli, chama tumeshangazwa zaidi na kiongozi huyo mkuu wa nchi kuamua kuonesha 'double standards' kwa kiwango cha juu, jambo ambalo ni litazidi kuzua maswali mengi, ikiwa ni pamoja na, je Rais anaujua vyema unyeti na uzito wa nafasi aliyonayo?

Katika mkutano huo Rais Magufuli amesikika akimsifia kwa uchapa kazi mtu anayeshikilia nafasi ya Mkuu wa Mkoa wa Dar es Salaam kwa sasa, kiasi cha kwenda mbali na kusema kuwa yeye Rais hajali hata kama watu wanasema huyo Mkuu wa Mkoa hajasoma, kwani kwake (Rais) hata kama angekuwa hajui kusoma 'A', kukamata dawa za kulevya inatosha kuwa usomi.

Kauli hiyo pamoja na kutolewa kwa maneno machache, imekuwa na mwangwi hasi mkubwa katika maeneo tuliyotaja hapo juu; hadhi ya urais, utii wa sheria, uzingatiaji wa taratibu za kuendesha nchi na misingi ya demokrasia na utawala bora.

Kauli hiyo ambayo inaonekana imetolewa kama kujibu makombora ya tuhuma anazoelekezewa Mkuu wa Mkoa huyo kwa muda mrefu sasa bila kuwepo na ufafanuzi wowote, kuhusu utata wa elimu yake na majina anayotumia, imeibua mtanziko mkubwa katika masuala yafuatayo;

1. Uhalali wa agizo la Rais Magufuli kuwafukuza watumishi wa umma wanaodaiwa kuwa na vyeti feki

Itakumbukwa kuwa miezi ya awali mara tu baada ya kuingia madarakani, Rais Magufuli alitangaza zoezi la kukagua vyeti vya watumishi wa umma, ambalo hatimae lilisababisha Rais kutoa agizo la kufukuzwa kazi kwa takriban watu 90,000 waliokuwa watumishi wa serikali, bila kufuata taratibu za sheria. Maumivu na machozi ya matokeo ya zoezi hilo hayajaisha wala kukauka miongoni wa waathirika na Watanzania wengi kwa jumla. Je Rais anajua kuwa kauli yake ya leo kuonesha kuwa 'vyeti' si suala muhimu, ameondoa uhalali wowote ule uwe wa kisheria au wa kisiasa wa agizo lake la kuwafukuza watumishi wale waliodaiwa kutokuwa na vyeti? Je anajua ametonesha vidonda ambavyo havijapona?

2. Uhalali wa kauli ya Rais Magufuli kuwa Serikali yake hailei 'vilaza'

Mnamo mwezi Juni mwaka huu, Rais Magufuli alinukuliwa akisema kuwa Serikali yake haiwezi 'kulea' vilaza (kwa maana ya watu wasiokuwa na sifa stahili) akizungumzia sakata la wanafunzi vijana waliokuwa wamedahiliwa kusoma programu maalum ya ualimu katika Chuo Kikuu cha UDOM. Je Rais Magufuli anajua kuwa kauli yake ya leo inaonesha kuwa hakuwa na nia ya dhati kupinga 'vilaza' kwenye serikali yake? Na kwamba hakuwa mkweli kwa sababu wapo vilaza anaowatetea?

3. Kauli ya Rais Magufuli na shauri lililoko Sekretarieti ya Maadili ya Viongozi wa Umma

Baada ya madai ya utata wa majina anayotumia Mkuu wa Mkoa wa Dar es Salaama na elimu yake kutopatia majibu wala ufafanuzi, Meya wa Manispaa ya Ubungo, Boniface Jacob, aliamua kufungua shauri mbele ya Sekretarieti ya Maadili ya Viongozi wa Umma, ili mamlaka hiyo ishughulikie suala hilo kwa kadri ya Sheria za nchi na kumaliza utata uliopo.

Lakini katika hali ya kushangaza leo, Rais Magufuli amenukuliwa akitoa kauli katika namna ambayo inamsafisha mkuu huyo wa mkoa na hivyo kuingilia shauri huku maoni yake yakielekea kuweka ushawishi na kuelekeza hukumu.

4. Rais kutoa kauli mbili zinazokinzana kuhusu haki ya kisheria ya nyongeza ya mishahara kwa watumishi

Wakati wa Sikukuu ya Mei Mosi, mwaka huu, Rais Magufuli alinukuliwa akikiri kuwa serikali yake haijatekeleza agizo la kisheria la kuongeza mishahara kwa wafanyakazi wake. Akatoa ahadi kuwa kupitia bajeti ya mwaka 2017/2018, wafanyakazi wataongezewa mishahara.

Katika hali ya kushangaza, leo Rais Magufuli katoa kauli inayokinzana na kauli ya Mei Mosi, ambapo amenukuliwa akisema kuwa hajapandisha mshahara wala hana mpango wa kupandisha mshahara kwa sababu bado anataka kuwaletea wananchi maendeleo.

Hitimisho

Ni wazi kuwa kauli hizi za Rais Magufuli, kama ilivyo kwa kauli zake zingine ambazo amekuwa akizitoa mara kwa mara, zinaendelea kujenga ombwe la kiuongozi ndani ya nchi na kuongeza maumivu na machungu badala ya kuleta faraja na matumaini.

Tutumie nafasi hii kuwapatia pole za dhati wafanyakazi wote nchini kwa kauli hii ya leo, ambayo inaweza kuvunja ari yao ya kazi na kuwakatisha tamaa. Tuwakumbushe tu kuwa mapambano ya wafanyakazi ni jambo endelevu na nyongeza ya mshahara ni haki yao kisheria. Haitolewi kwa hisani au mapenzi ya kiongozi yeyote yule.

Aidha, tunapenda kumkumbusha Rais Magufuli kuwa amekuwa akisikika akitumia maneno kuwa yeye ni mtetezi wa wanyonge, ni vyema akajua kuwa miongoni mwa wanyonge ni pamoja na wafanyakazi hao wanaoomba kuongezewa kima cha chini cha mshahara.

Imetolewa leo Jumanne, Oktoba 3, 2017 na;

Tumaini Makene

Mkuu wa Idara ya Habari na Mawasiliano
CHADEMA